സംസ്ഥാനത്തെ പ്ലസ് ടു, വൊക്കേഷണൽ ഹയർ സെക്കൻഡറി (VHSE) പരീക്ഷാഫലം പ്രഖ്യാപിച്ചു. ഹയർ സെക്കൻഡറി വിഭാഗത്തിൽ 77.97 ശതമാനമാണ് വിജയം. സെക്രട്ടറിയേറ്റിലെ പിആർഡി ചേംബറിൽ വച്ച് വിദ്യാഭ്യാസമന്ത്രി എൻ. ഷംസുദീനാണ് ഫലപ്രഖ്യാപനം നടത്തിയത്. ഇത്തവണ ഹയർ സെക്കൻഡറി, വിഎച്ച്എസ്ഇ വിഭാഗങ്ങളിലായി ആകെ 4.25 ലക്ഷം വിദ്യാർഥികളാണ് പരീക്ഷ എഴുതിയത്.
കഴിഞ്ഞ വർഷത്തെ അപേക്ഷിച്ച് ഇത്തവണ വിജയശതമാനത്തിൽ 0.16 ശതമാനത്തിന്റെ നേരിയ വർധനവ് രേഖപ്പെടുത്തിയിട്ടുണ്ട്. വൊക്കേഷണൽ ഹയർ സെക്കൻഡറി വിഭാഗത്തിൽ 72.49 ശതമാനമാണ് വിജയം. വിഎച്ച്എസ്ഇ വിഭാഗത്തിലും കഴിഞ്ഞ വർഷത്തേക്കാൾ വിജയശതമാനം കൂടുതലാണ്. വിവിധ സർക്കാർ വെബ്സൈറ്റുകളിലും മൊബൈൽ ആപ്ലിക്കേഷനുകളിലും ഫലം ലഭ്യമാണ്.
പരീക്ഷാഫലത്തിൽ ഇത്തവണയും ഇടുക്കി ജില്ലയാണ് മുന്നിൽ. 84.64% വിജയവുമായി ഇടുക്കി ഒന്നാം സ്ഥാനം നിലനിർത്തിയപ്പോൾ ഏറ്റവും കുറവ് വിജയശതമാനം രേഖപ്പെടുത്തിയത് കാസർഗോഡ് ജില്ലയിലാണ് (71.72%). വൊക്കേഷണൽ ഹയർ സെക്കൻഡറി വിഭാഗത്തിലും പെൺകുട്ടികളാണ് വിജയത്തിൽ മുന്നിട്ടുനിൽക്കുന്നത്. വിഎച്ച്എസ്ഇ വിഭാഗത്തിൽ കൂടുതൽ വിജയം ഇടുക്കിയിലും കുറവ് കാസർഗോഡുമാണ്.
