മാർപാപ്പയായിരുന്ന കാലയളവിലെ ഫ്രാൻസിസ് പാപ്പയുടെ ശ്രദ്ധേയമായ പത്ത് കാര്യങ്ങൾ

തന്റെ പ്രവർത്തികൾകൊണ്ടും വാക്കുകൾകൊണ്ടും വളരെ വ്യത്യസ്തനായ വ്യക്തിയായിരുന്നു ഫ്രാൻസിസ് പാപ്പ. മാർപാപ്പയായിരുന്ന കാലയളവിൽ ശ്രദ്ധേയമായ ഫ്രാൻസിസ് പാപ്പയുടെ പ്രധാനപ്പെട്ട പത്ത്  കാര്യങ്ങൾ ഇതാ.

1. സുവിശേഷത്തിൻ്റെ സന്തോഷം – ഇവാഞ്ചലി ഗൗദിയം

ഫ്രാൻസിസ് മാർപാപ്പയുടെ ആദ്യത്തെ അപ്പസ്തോലിക പ്രബോധനമാണ് ‘സുവിശേഷത്തിൻ്റെ സന്തോഷം’ (ഇവാഞ്ചലി ഗൗദിയം) എന്നത്. “അതിനാൽ പോയി എല്ലാ ജനതകളെയും ശിഷ്യപ്പെടുത്തുവിൻ…” (മത്തായി 28:19) എന്ന യേശുവിന്റെ കൽപ്പന ഫ്രാൻസിസ് പാപ്പ നമ്മെ ഓർമ്മിപ്പിക്കുന്നു. നമ്മൾ മിഷനറിമാരാണെന്നും സന്തോഷത്തോടും ഉത്സാഹത്തോടും കൂടി സുവിശേഷം ജീവിക്കുക എന്നതാണ് ഏറ്റവും വലിയ സുവിശേഷ പ്രവർത്തനമെന്നും ഈ അപ്പസ്തോലിക പ്രബോധനത്തിൽ മാർപാപ്പ ഊന്നിപ്പറയുന്നു. ഈ പ്രബോധനത്തിൽ നിന്നാണ് ഇടയന്മാർ ‘ആടുകളുടെ ഗന്ധം’ അറിയുന്നവരാകണം എന്ന പ്രസിദ്ധമായ വാചകവും സന്ദേശവും ലഭിക്കുന്നത്.

2. ‘മറ്റുള്ളവരെ വിധിക്കാൻ ഞാൻ ആരാണ്?’

റോമിലേക്കുള്ള യാത്രയ്ക്കിടെ ഒരു മാധ്യമപ്രവർത്തകൻ സ്വവർഗ്ഗാനുരാഗികളെക്കുറിച്ച് ചോദിച്ചപ്പോൾ, ഫ്രാൻസിസ് പാപ്പ പ്രതികരിച്ചത് ഇപ്രകാരമാണ് “ആരെങ്കിലും സ്വവർഗ്ഗാനുരാഗിയാണെങ്കിൽ, അവൻ കർത്താവിനെ അന്വേഷിക്കുകയും നല്ല മനസ്സുള്ളവനുമാണെങ്കിൽ, മറ്റുള്ളവരെ വിധിക്കാൻ ഞാൻ ആരാണ്?” (If someone is gay and he searches for the Lord and has good will, who am I to judge?”). ഫ്രാൻസിസ് പാപ്പയുടെ ഈ വാക്കുകൾ ലോകത്തെ ഞെട്ടിച്ചു. ഈ പ്രസ്താവനയെക്കുറിച്ച് പിന്നീട് ചോദിച്ചപ്പോൾ പാപ്പ ഇപ്രകാരം വിശദമാക്കി:  “കത്തോലിക്ക സഭയുടെ മതബോധനത്തെ ഞാൻ ഹൃദയപൂർവ്വം വ്യാഖ്യാനിക്കുകയായിരുന്നു. ആളുകളെ ഹൃദ്യമായി പരിഗണിക്കണമെന്നും ആരെയും പാർശ്വവത്കരിക്കരുതെന്നും മതപ്രബോധനം പഠിപ്പിക്കുന്നു.” എങ്കിലും പാപ്പ ചെയ്തത് സ്വവർഗരതിയെയും കത്തോലിക്കാ സഭയെയും കുറിച്ചുള്ള സംഭാഷണത്തിന്റെ രീതി മാറ്റുകയായിരുന്നു. ‘അസ്വാസ്ഥ്യത്തെ’ കുറിച്ച് സംസാരിക്കുന്നതിനുപകരം ഫ്രാൻസിസ് മാർപാപ്പ അനുകമ്പയെക്കുറിച്ചാണ് സംസാരിച്ചത്.

3. പൊതു ഭവനത്തെ പരിപാലിക്കുന്നു – ലൗദാത്തോ സി

നിലവിൽ മനുഷ്യന്റെ പ്രവർത്തനങ്ങൾ പരിസ്ഥിതിക്ക് വരുത്തുന്ന അപകടങ്ങളെയും, പാരിസ്ഥിതിക ദുരന്തങ്ങളിൽ നിന്ന് ഏറ്റവും കൂടുതൽ ആഘാതം അനുഭവിക്കുന്നത് ദരിദ്രരും ദുർബലരുമാണ് എന്ന വസ്തുതയെയും ‘ലൗദാത്തോ സി’ എന്ന ചാക്രികലേഖനത്തിൽ എടുത്തുകാണിക്കുന്നു. ഈ ചാക്രിക ലേഖനം ആത്യന്തികമായി ബന്ധങ്ങളെക്കുറിച്ചാണ് സംസാരിക്കുന്നത്: ദൈവത്തിന്റെ ദാനമായ ഭൂമിയുമായി നമുക്കുള്ള ബന്ധവും ജീവിതത്തിനും ആരോഗ്യത്തിനും ഉപജീവനത്തിനും വേണ്ടി ഭൂമിയെ ആശ്രയിക്കുന്ന മറ്റ് മനുഷ്യരുമായി നമുക്കുള്ള ബന്ധവും. മുൻഗാമികളായ ബെനഡിക്ട് പാപ്പയുടെയും വിശുദ്ധ ജോൺ പോൾ രണ്ടാമൻ മാർപാപ്പയുടെയും കൃതികൾ ഉദ്ധരിച്ച് ഫ്രാൻസിസ് പാപ്പ, പരിസ്ഥിതി ശാസ്ത്രത്തെക്കുറിച്ച് സംസാരിക്കുന്ന ആദ്യത്തെ മാർപ്പാപ്പയല്ല താനെന്ന് നമ്മെ ഓർമ്മിപ്പിക്കുന്നു.

4. വി. പീറ്റർ ഫേബറിന്റെ വിശുദ്ധ പദവി

ഇതുവരെ, 800-ലധികം രക്തസാക്ഷികളുൾപ്പെടെ 911 പേരെ ഫ്രാൻസിസ് പാപ്പ വിശുദ്ധരുടെ പദവിയിലേക്ക് ഉയർത്തി. ജോൺ പോൾ രണ്ടാമൻ, ജോൺ XXIII, പോൾ ആറാമൻ എന്നീ മാർപാപ്പാമാരും ഇവരിൽ ഉൾപ്പെടുന്നു. ജെസ്യൂട്ടായ പീറ്റർ ഫേബറിന്റെ വിശുദ്ധ പദവിയും അതിൽ ഉൾപ്പെടുന്നു. വി. ഇഗ്നേഷ്യസിനൊപ്പം തുടക്കം മുതൽ ഫാബർ ഉണ്ടായിരുന്നു. ഇഗ്നേഷ്യസ്തന്നെ ആത്മീയ പരിശീലനങ്ങൾ നൽകാനുള്ള അദ്ദേഹത്തിന്റെ കഴിവിനെക്കുറിച്ച് അഭിപ്രായപ്പെട്ടിട്ടുണ്ട്. 2013 ഡിസംബർ 17-ന് മാർപാപ്പയുടെ 77-ാം ജന്മദിനത്തിൽ ഫാബറിനെ അദ്ദേഹം വിശുദ്ധനായി പ്രഖ്യാപിച്ചു.

5. അമേരിക്കയിലേക്കുള്ള യാത്രയും കോൺഗ്രസിനെ അഭിസംബോധന ചെയ്യലും 

2015-ൽ, ഫ്രാൻസിസ് മാർപാപ്പ തന്റെ ആദ്യ അമേരിക്കൻ സന്ദർശനം നടത്തി, വാഷിംഗ്ടൺ, ഡി.സി., ന്യൂയോർക്ക്, ഫിലാഡൽഫിയ എന്നിവിടങ്ങൾ പാപ്പ സന്ദർശിച്ചു. ഈ യാത്രയുടെ ഏറ്റവും ചരിത്രപരമായ വശങ്ങളിലൊന്ന് കോൺഗ്രസിന്റെ സംയുക്ത സമ്മേളനങ്ങൾക്ക് മുമ്പുള്ള പാപ്പായുടെ പ്രസംഗമായിരുന്നു. അങ്ങനെ ചെയ്യുന്ന ആദ്യത്തെ മാർപാപ്പയാണ് ഫ്രാൻസിസ് പാപ്പ. നമ്മിൽ ഏറ്റവും ദുർബലരായവരെ പരിപാലിക്കാൻ പാപ്പ എല്ലാ പ്രതിനിധികളോടും അമേരിക്കക്കാരോടും അഭ്യർത്ഥിച്ചു: ദരിദ്രരെയും പ്രായമായവരെയും പരിപാലിക്കുക, വിദ്വേഷം, അക്രമം, മതഭ്രാന്ത് എന്നിവ ഇല്ലാതാക്കുക, കുടിയേറ്റക്കാരെ സ്വാഗതം ചെയ്യുക, വികസനത്തിന്റെ ഓരോ ഘട്ടത്തിലും മനുഷ്യജീവിതത്തെ സംരക്ഷിക്കുക, നമ്മുടെ പൊതു ഭവനത്തെ പരിപാലിക്കുക. എബ്രഹാം ലിങ്കൺ, ഡോ. മാർട്ടിൻ ലൂഥർ കിംഗ്, ജൂനിയർ, ഡൊറോത്തി ഡേ, തോമസ് മെർട്ടൺ എന്നിവരെ അമേരിക്കൻ ജനതയുടെ പ്രതീകങ്ങളായി അദ്ദേഹം ഉയർത്തിക്കാട്ടി.

6. കോവിഡ് സമയത്ത് ലോകത്തിനായുള്ള ‘ഉർബി എത്ത് ഓർബി’ ആശീർവാദം

2020 മാർച്ച് 27 ന്, ലോകമെമ്പാടും കോവിഡ് പകർച്ചവ്യാധിയിൽപ്പെട്ട് ഉഴലുമ്പോൾ ഫ്രാൻസിസ് മാർപാപ്പ സെന്റ് പീറ്റേഴ്‌സ് സ്ക്വയറിൽ ശക്തമായ പ്രാർഥനാ ശുശ്രൂഷ നടത്തി. സാധാരണയായി ഇത്തരം പരിപാടികൾക്കായി ആളുകൾ തിങ്ങിനിറഞ്ഞിരുന്ന സ്ക്വയർ, ഈ പ്രാർത്ഥനയുടെ സമയത്ത് ഏതാണ്ട് ശൂന്യമായിരുന്നു. ഫ്രാൻസിസ് മാർപാപ്പ ഇരുട്ടിലേക്ക് നോക്കി, വിശുദ്ധ കുർബാനയുടെ അസാധാരണമായ അനുഗ്രഹമായ “ഉർബി എത്ത്  ഓർബി” (നഗരത്തിനും ലോകത്തിനും) ആശീർവാദം നൽകി.

7. സാഹോദര്യവും സാമൂഹിക സൗഹൃദവും – ഫ്രത്തെല്ലി തൂത്തി

2020 ലെ വിശുദ്ധ ഫ്രാൻസിസ് അസ്സീസിയുടെ തിരുനാളിൽ ഫ്രാൻസിസ് മാർപാപ്പ ഈ ചാക്രികലേഖനം പുറത്തിറക്കി. ‘ഫ്രത്തെല്ലി തൂത്തി’ ഫ്രാൻസിസ് പാപ്പയുടെ സാമൂഹിക അധ്യാപനത്തിലേക്ക് ഒരു പ്രധാന രൂപം നൽകുന്നു. കോവിഡ് പകർച്ചവ്യാധി കാരണം എല്ലാവരും വേർപിരിയാനും സാമൂഹിക അകലം പാലിക്കാനും ശീലിച്ച ഒരു സമയത്ത്, നമ്മൾ സഹോദരീസഹോദരന്മാരായി പങ്കിടുന്ന ബന്ധങ്ങളെക്കുറിച്ച് ഫ്രാൻസിസ് പാപ്പ നമ്മെ ഓർമ്മിപ്പിച്ചു. പൊതുവായ സാഹോദര്യം തിരിച്ചറിയാനും ജീവിക്കാനുമുള്ള എല്ലാ മനുഷ്യർക്കും വേണ്ടിയുള്ള ആഹ്വാനമാണ് ഈ ചാക്രികലേഖനം.

8. ‘ദൈവത്തിന്റെ ആളുകളുടെ ആരാധനാക്രമ രൂപീകരണത്തെക്കുറിച്ച്’ – ദെസിദെറോ ദെസിദെറാവി

2022-ലെ ഈ കത്തിലൂടെ, രണ്ടാം വത്തിക്കാൻ കൗൺസിലിന്റെ ആരാധനാക്രമ നവീകരണവും അതിന്റെ ലക്ഷ്യമായ കുർബാനയുടെ ‘പൂർണ്ണവും ബോധവും സജീവവും ഫലപ്രദവുമായ ആഘോഷം’ പ്രോത്സാഹിപ്പിക്കലും പാപ്പാ നടത്തി. സമൂഹത്തിലും സഭയിലും വളർന്നുവന്ന ഭിന്നതകൾ ശമിപ്പിക്കാനും ഫ്രാൻസിസ് മാർപാപ്പ ഇതിലൂടെ ശ്രമിച്ചു.

9. പാർശ്വവത്കരിക്കപ്പെട്ടവർക്ക് പ്രത്യേക പരിഗണന

വിസ്മരിക്കപ്പെട്ടവരെയും ദരിദ്രരെയും ദുർബലരെയും ഉയർത്തിക്കാട്ടാനും അവരോട്  അടുത്ത ബന്ധം പുലർത്താനും ഫ്രാൻസിസ് മാർപാപ്പ ശ്രമിച്ചിരുന്നു. പെസഹാ വ്യഴാഴ്ചത്തെ ശുശ്രൂഷകളിൽ 12 വൈദികരുടെ പാദങ്ങൾ കഴുകുന്നത് പതിവാണെങ്കിലും, ജയിലുകളിലും അഭയാർഥി കേന്ദ്രങ്ങളിലും എത്തി ഫ്രാൻസിസ് പാപ്പ കത്തോലിക്കരുടെയും കത്തോലിക്കരല്ലാത്തവരുടെയും പുരുഷന്മാരുടെയും സ്ത്രീകളുടെയും പാദങ്ങൾ കഴുകി. അങ്ങനെ ക്രിസ്തുവിന്റെ സ്നേഹം എല്ലാവരോടും പ്രകടമാക്കി.

10. ‘ഫ്രാൻസിസ്’ എന്ന പേര്

ജോർജ് മരിയോ ബെർഗോളിയോ എന്ന കർദ്ദിനാൾ മാർപാപ്പയായ ശേഷം ആദ്യമായി സെന്റ് പീറ്റേഴ്‌സ് ബസിലിക്കയുടെ ബാൽക്കണിയിലേക്ക് നടന്നപ്പോൾ അദ്ദേഹം ലോകത്തിന് ഒരു ലളിതമായ പുഞ്ചിരി സമ്മാനിച്ചു. അദ്ദേഹം തിരഞ്ഞെടുത്ത പേര് ‘ഫ്രാൻസിസ്’ എന്നായിരുന്നു. തുടർന്ന് പതിവിന് വിരുദ്ധമായി മാർപാപ്പ അനുഗ്രഹം നൽകുന്നതിന് മുമ്പായി തനിക്കുവേണ്ടി പ്രാർത്ഥിക്കാൻ അദ്ദേഹം ലോകത്തോട് ആവശ്യപ്പെട്ടു.

മാർപാപ്പയായിരുന്ന കാലയളവിൽ ഫ്രാൻസിസ് പാപ്പ അനവധി ശ്രദ്ധേയമായ കാര്യങ്ങൾ ചെയ്തിട്ടുണ്ട്. അവയിലെ മികച്ച 10 എണ്ണമാണ് ഇവിടെ അവതരിപ്പിക്കാൻ ശ്രമിച്ചത്.

സി. സൗമ്യ മുട്ടപ്പിള്ളിൽ DSHJ