കേരളത്തിൽ ഇന്നും വരും ദിവസങ്ങളിലും ശക്തമായ മഴയും ഇടിമിന്നലും തുടരുമെന്ന് കേന്ദ്ര കാലാവസ്ഥാ വകുപ്പിന്റെ (IMD) മുന്നറിയിപ്പ്. ഇതിന്റെ ഭാഗമായി വടക്കൻ കേരളത്തിലെ കണ്ണൂർ, കാസർകോട് ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചു.
ബംഗാൾ ഉൾക്കടലിന്റെ മധ്യഭാഗത്തായി നിലനിൽക്കുന്ന അന്തരീക്ഷ ചുഴി രൂപീകരണവും തെലങ്കാന മുതൽ മന്നാർ ഗൾഫ് വരെ നീളുന്ന ന്യൂനമർദ്ദവുമാണ് കേരളത്തിൽ നിലവിലെ ശക്തമായ മഴയ്ക്ക് കാരണം. ഇതിന്റെ സ്വാധീനത്താൽ സംസ്ഥാനത്തുടനീളം ഇതിനകം തന്നെ വ്യാപകമായ മഴ രേഖപ്പെടുത്തിയിട്ടുണ്ട്.
ജൂൺ 28 വരെ സംസ്ഥാനത്ത് പരക്കെ മഴയുണ്ടാകുമെന്നാണ് പ്രവചനം. തിരുവനന്തപുരത്തും പരിസര പ്രദേശങ്ങളിലും പൊതുവെ മേഘാവൃതമായ അന്തരീക്ഷമായിരിക്കുമെന്നും ശക്തമായ ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു. ജൂൺ 25 മുതൽ 28 വരെയുള്ള ദിവസങ്ങളിലും കേരളത്തിൽ ശക്തമായ മഴ തുടരും. ആലപ്പുഴ, എറണാകുളം, തൃശ്ശൂർ, മലപ്പുറം, കോഴിക്കോട്, വയനാട്, കണ്ണൂർ, കാസർകോട്, പത്തനംതിട്ട, കോട്ടയം എന്നീ ജില്ലകളെയാണ് മഴ പ്രധാനമായും ബാധിക്കുക. മഴയോടൊപ്പം മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ ശക്തമായ കാറ്റും ശക്തമായ ഇടിമിന്നലും ഉണ്ടാകാൻ സാധ്യതയുണ്ട്.
