ഇന്ത്യൻ പാസ്പോർട്ട് എന്നത് കേവലം ഒരു ‘യാത്രാ രേഖ’ മാത്രമാണെന്നും അതിനെ പൗരത്വം തെളിയിക്കാനുള്ള രേഖയായി കണക്കാക്കാൻ കഴിയില്ലെന്നും വിദേശകാര്യ മന്ത്രാലയം വ്യക്തമാക്കി. വിദേശ രാജ്യങ്ങളിലൂടെ യാത്ര ചെയ്യുന്നതിനും അവിടെ തങ്ങുന്നതിനും സഹായിക്കുക മാത്രമാണ് പാസ്പോർട്ടിന്റെ പ്രധാന ലക്ഷ്യമെന്നും മന്ത്രാലയം ബുധനാഴ്ച പറഞ്ഞു.
വോട്ടർപട്ടികയിൽ നിന്നുള്ള ഒഴിവാക്കലുകളെ ചോദ്യം ചെയ്യാൻ പാസ്പോർട്ട് ഉപയോഗിക്കാമോ എന്ന ചോദ്യത്തിന് മറുപടിയായാണ് മന്ത്രാലയം ഈ കാര്യം വ്യക്തമാക്കിയത്. പൗരത്വ അവകാശങ്ങൾ സ്ഥാപിക്കാൻ ഉപയോഗിക്കുന്ന മറ്റ് ഔദ്യോഗിക രേഖകളുമായി പാസ്പോർട്ടിനെ താരതമ്യം ചെയ്യരുതെന്നും അധികൃതർ കൂട്ടിച്ചേർത്തു.
അതേസമയം, ഇന്ത്യൻ തൊഴിലാളികളെ ആഗോള സമ്പദ്വ്യവസ്ഥയുമായി ബന്ധിപ്പിക്കുന്നതിൽ പാസ്പോർട്ടുകൾ വലിയൊരു പങ്കുവഹിക്കുന്നുണ്ടെന്ന് വിദേശകാര്യ മന്ത്രാലയം ഓർമ്മിപ്പിച്ചു. സുരക്ഷിതമായ തൊഴിലവസരങ്ങൾ ഉറപ്പാക്കുന്നതിനായി വരും മാസങ്ങളിൽ ജപ്പാൻ ഉൾപ്പെടെയുള്ള വികസിത രാജ്യങ്ങളുമായി ഇന്ത്യ ചർച്ചകൾ ശക്തമാക്കുമെന്നും അധികൃതർ അറിയിച്ചു.
