വഴിനീളെ ഉരുകിപ്പോയ കാറുകളുടെ അവശിഷ്ടങ്ങൾ, ഇരുണ്ടുകരിഞ്ഞ കുന്നിൻചെരിവുകൾ… സ്പെയിനിലെ അൽമേരിയ (Almeria) പ്രവിശ്യയിലെ ബേദാർ ഗ്രാമത്തിലേക്ക് തിരിച്ചെത്തിയപ്പോൾ ബ്രിട്ടീഷ് ദമ്പതികളായ എമ്മ മിച്ചലിനും ഭർത്താവ് സൈമണിനും സങ്കടവും ഒപ്പം അത്ഭുതവും അടക്കാനായില്ല. തങ്ങളുടെ സ്വപ്നതുല്യമായ വീടും വളർത്തു മൃഗങ്ങളും കാട്ടുതീയിൽ പൂർണ്ണമായും കത്തിയമർന്നിട്ടുണ്ടാകുമെന്നാണ് അവർ കരുതിയത്. എന്നാൽ, ചുറ്റുമുള്ള വീടുകൾ പലതും കരിഞ്ഞുണങ്ങിയപ്പോഴും ഇവരുടെ വീട് അത്ഭുതകരമായി രക്ഷപ്പെട്ടിരുന്നു! സ്പെയിനിന്റെ ചരിത്രത്തിലെ തന്നെ ഏറ്റവും ദാരുണമായ കാട്ടുതീ ദുരന്തങ്ങളിലൊന്നിൽ നിന്നും സ്വന്തമെന്ന് കരുതിയവയെല്ലാം ഉപേക്ഷിച്ച് ജീവനും കൊണ്ട് ഓടിയ ബ്രിട്ടീഷ് ദമ്പതികൾ തിരികെ എത്തിയപ്പോൾ കണ്ട കാഴ്ചകൾ അക്ഷരാർത്ഥത്തിൽ ഞെട്ടിക്കന്നതായിരുന്നു.
ചാരത്തിനിടയിലെ അതിജീവനം
ഏകദേശം 7,000 ഹെക്ടറോളം വനഭൂമിയും ജനവാസ മേഖലകളുമാണ് കാട്ടുതീ വിഴുങ്ങിയത്. മണിക്കൂറിൽ 50 കിലോമീറ്റർ വേഗതയിൽ വീശിയടിച്ച കാറ്റിനാലാണ് വേഗം തീ പടരാൻ കാരണമായത്. പ്രവിശ്യയിൽ നിന്ന് ഒഴിപ്പിച്ചുമാറ്റിയ 1,500-ഓളം ആളുകളിൽ 600 പേരോട് ഞായറാഴ്ചയോടെ വീടുകളിലേക്ക് മടങ്ങാൻ അധികൃതർ നിർദ്ദേശിക്കുകയായിരുന്നു.
“ഞങ്ങളുടെ വീടിന് തൊട്ടടുത്ത് വരെ തീയെത്തിയിരുന്നു. സുഹൃത്തുക്കളുടെ പല വീടുകളും പൂർണ്ണമായും കത്തിനശിച്ചു. ജീവനോടെ തിരിച്ചെത്താൻ കഴിഞ്ഞത് ഒരു അത്ഭുതമാണ്. ഞങ്ങളുടെ വീട്ടിൽ അരുമയോടെ വളർത്തിയ കോഴികളും ജീവനോടെയുണ്ട്, വെള്ളവും വൈദ്യുതിയും പുനഃസ്ഥാപിക്കപ്പെട്ടിട്ടുണ്ട്” – കണ്ണീരോടെ എമ്മ മിച്ചൽ പറഞ്ഞു.
“ഇരകളെ കുറ്റപ്പെടുത്തരുത്”: അധികൃതർക്കെതിരെ പ്രതിഷേധം
അപകടസമയത്ത് അധികൃതരിൽ നിന്ന് കൃത്യമായ മുന്നറിയിപ്പുകളോ എമർജൻസി അലേർട്ടുകളോ ലഭിച്ചില്ലെന്ന് എമ്മ ആരോപിക്കുന്നു. അകലെയുള്ള ഭൂകമ്പങ്ങൾക്ക് പോലും ഫോണിൽ മുന്നറിയിപ്പ് ലഭിക്കാറുള്ളപ്പോൾ, തൊട്ടടുത്ത് തീ പടർന്നിട്ടും ഒരു ഫോൺ സന്ദേശം പോലും ലഭിച്ചില്ലെന്ന് അവർ ചൂണ്ടിക്കാട്ടി. മരിച്ചവർ നിർദ്ദേശങ്ങൾ പാലിച്ചില്ലെന്ന പ്രാദേശിക ഭരണകൂടത്തിന്റെ വാദത്തിനെതിരെയും വലിയ രീതിയിലുള്ള പ്രതിഷേധമാണ് ഉയരുന്നത്. ദുരന്തസമയത്ത് ജീവൻ രക്ഷിക്കാൻ സാധ്യമായതെല്ലാം ചെയ്ത് മരണത്തിന് കീഴടങ്ങിയ പാവങ്ങളെ കുറ്റപ്പെടുത്താൻ ശ്രമിക്കരുതെന്ന് എമ്മ രോഷത്തോടെ പറഞ്ഞു.
1984-ൽ ലാ ഗോമെറയിലുണ്ടായ 20 പേരുടെ മരണത്തിന് ഇടയാക്കി കാട്ടുതീക്കും 1979-ൽ യോറെറ്റ് ഡി മാറിലുണ്ടായ ദുരന്തത്തിനും ശേഷം സ്പെയിൻ നേരിടുന്ന ഏറ്റവും വലിയ കാട്ടുതീ ദുരന്തമാണിത്. ആഗോള താപനവും കാലാവസ്ഥാ വ്യതിയാനവും മൂലം വർദ്ധിച്ചുവരുന്ന ഉഷ്ണതരംഗങ്ങളാണ് ഇത്തരം വൻ ദുരന്തങ്ങൾക്ക് വഴിവെക്കുന്നതെന്ന് പരിസ്ഥിതി പ്രവർത്തകർ മുന്നറിയിപ്പ് നൽകുന്നു.
ഈ സ്പാനിഷ് കാട്ടുതീ ദുരന്തം കാലാവസ്ഥാ വ്യതിയാനം സൃഷ്ടിക്കുന്ന ആഘാതം എത്രത്തോളം ഭയാനകമാണെന്നതിന്റെ ഉദാഹരണമാണ്. എമ്മയെപ്പോലുള്ള ചിലർക്ക് ജീവനും സ്വത്തും തിരികെ ലഭിച്ചപ്പോഴും, അനേകം ജീവനുകൾ പൊലിയുകയും വീടുകൾ കത്തിയമരുകയും ചെയ്തത് നികത്താനാകാത്ത ആഘാതമാണ് പ്രദേശത്ത് ഉണ്ടാക്കിയിരിക്കുന്നത്. കാലാവസ്ഥാ വ്യതിയാനത്തിനെതിരെ ആഗോളതലത്തിൽ അടിയന്തിര മുൻകരുതലുകൾ എടുത്തില്ലെങ്കിൽ, ഇത്തരം ഭയാനകമായ ദുരന്തങ്ങൾ ഇനിയും ആവർത്തിക്കുമെന്ന വലിയൊരു മുന്നറിയിപ്പാണ് ഈ സംഭവം നൽകുന്നത്.
