ഡെമോക്രാറ്റിക് റിപ്പബ്ലിക് ഓഫ് കോംഗോയിൽ (DRC) പടർന്നുപിടിക്കുന്ന എബോള വൈറസ് ബാധയിൽ മരിച്ചവരുടെ എണ്ണം 600 കടന്നതായി റിപ്പോർട്ട്. രാജ്യത്തെ പ്രമുഖ നഗരമായ കിസംഗാനി സ്ഥിതി ചെയ്യുന്ന ത്ഷോപ്പോ (Tshopo) പ്രവിശ്യ ഉൾപ്പെടെയുള്ള പുതിയ മേഖലകളിലേക്കും രോഗം പടരുന്നതായി ആരോഗ്യമന്ത്രാലയത്തിന്റെ ഏറ്റവും പുതിയ വിവരങ്ങൾ വ്യക്തമാക്കുന്നു.
മെയ് 15-ന് ഔദ്യോഗികമായി സ്ഥിരീകരിച്ച രോഗബാധ ഇതുവരെ 1,759-ലധികം ആളുകളിലാണ് കണ്ടെത്തിയത്. രാജ്യത്തിന്റെ കിഴക്കൻ പ്രവിശ്യകളായ ഇട്ടൂരി, നോർത്ത് കിവു, സൗത്ത് കിവു എന്നിവിടങ്ങളിലാണ് രോഗവ്യാപനം അതിരൂക്ഷമായി തുടരുന്നത്.
ത്ഷോപ്പോ പ്രവിശ്യയുടെ തലസ്ഥാനവും കോംഗോയിലെ പ്രധാന നഗരങ്ങളിലൊന്നുമായ കിസംഗാനിയിൽ രണ്ട് എബോള കേസുകൾ റിപ്പോർട്ട് ചെയ്തിട്ടുണ്ട്. ഇതിൽ ഒരു കേസ് രോഗബാധയുടെ പ്രഭവകേന്ദ്രമായ ഇട്ടൂരി പ്രവിശ്യയുമായി ബന്ധപ്പെട്ടതാണെങ്കിലും, രണ്ടാമത്തെ കേസിന് മറ്റ് പ്രദേശങ്ങളുമായി നേരിട്ട് ഭൂമിശാസ്ത്രപരമായ ബന്ധമൊന്നുമില്ലെന്ന് വിലയിരുത്തപ്പെടുന്നു. നഗരത്തിൽ രോഗബാധ സ്ഥിരീകരിച്ചതിനെ തുടർന്ന് രോഗികളുമായി സമ്പർക്കത്തിൽ വന്നവരെ കണ്ടെത്താനും നിരീക്ഷണം ശക്തമാക്കാനുമുള്ള അടിയന്തര നടപടികൾ ആരംഭിച്ചു. ത്ഷോപ്പോ, ഹോട്ട്-ഉയെലെ പ്രവിശ്യകളിൽ മുൻകരുതൽ നടപടികൾ തുടരുകയാണ്. അവസാന 24 മണിക്കൂറിനുള്ളിൽ മാത്രം 51 പുതിയ കേസുകളും 20 മരണങ്ങളും റിപ്പോർട്ട് ചെയ്തിട്ടുണ്ട്.
