ഫുട്ബോൾ ലോകം ഒന്നടങ്കം കാത്തിരുന്ന ആവേശം അതിന്റെ കൊടുമുടിയിലായിരിക്കേ ഫിഫ ലോകകപ്പ് വേദികളിൽ നിന്ന് ഇപ്പോൾ പുറത്തുവരുന്നത് ചരിത്ര നേട്ടങ്ങളുടെ വാർത്തകളാണ്. ജൂൺ 16 ചൊവ്വാഴ്ച നടന്ന മത്സരങ്ങൾ ലോകകപ്പിന്റെ ചരിത്രതാളുകളിൽ ഇനി സുവർണ്ണാക്ഷരങ്ങളാൽ രേഖപ്പെടുത്തപ്പെടും. ഒരൊറ്റ ദിവസം കൊണ്ട് ഏറ്റവും കൂടുതൽ കാണികൾ സ്റ്റേഡിയത്തിലെത്തിയെന്ന 32 വർഷം പഴക്കമുള്ള റെക്കോർഡാണ് ആരാധകർ ഇപ്പോൾ തകർത്തെറിഞ്ഞിരിക്കുന്നത്.
ചൊവ്വാഴ്ച നടന്ന നാല് ആവേശപ്പോരാട്ടങ്ങൾ സാക്ഷ്യം വഹിക്കാൻ സ്റ്റേഡിയങ്ങളിലേക്ക് ഒഴുകിയെത്തിയത് ആകെ 2,81,223 കാണികളാണ്! ഇതിനുമുമ്പ് 1994 ജൂൺ 28-ന് അമേരിക്കൻ ലോകകപ്പിൽ തന്നെ കുറിക്കപ്പെട്ട 2,77,070 കാണികളുടെ റെക്കോർഡാണ് ഇത്തവണ വഴിമാറിയത്.
ഗാലറികളിൽ ഇരമ്പിയാർത്തത് ജനസാഗരം താരപ്പൊലിമയും അട്ടിമറി വീര്യവും നിറഞ്ഞ നാല് മത്സരങ്ങളാണ് ചൊവ്വാഴ്ച കാണികളെ സ്റ്റേഡിയങ്ങളിലേക്ക് ആകർഷിച്ചത്.
ലോകകപ്പ് ആരംഭിച്ച് ആറ് ദിവസങ്ങൾ മാത്രം പിന്നിടുമ്പോൾ സ്റ്റേഡിയങ്ങളിലെത്തിയ ആകെ കാണികളുടെ എണ്ണം 13,09,652 ആയി ഉയർന്നു കഴിഞ്ഞു. അതായത് ഒരു മത്സരത്തിൽ ശരാശരി 65,483 കാണികൾ! ഇതേ വേഗതയിൽ മുന്നോട്ട് പോയാൽ 1994-ലെ 3.5 മില്യൺ (35 ലക്ഷം) എന്ന ആകെ കാണികളുടെ റെക്കോർഡും ഇത്തവണത്തെ 2026 ലോകകപ്പ് അനായാസം മറികടക്കുമെന്ന് അന്താരാഷ്ട്ര ഫുട്ബോൾ ഫെഡറേഷൻ (FIFA) വ്യക്തമാക്കുന്നു.
