ചെറിയ കുട്ടികളുള്ള വീടുകളിൽ എന്നും കേൾക്കുന്ന ഒന്നാണ് അവരുടെ വാശിയും കരച്ചിലും. പലപ്പോഴും പൊതുസ്ഥലങ്ങളിൽ വെച്ചോ ബന്ധുക്കളുടെ മുന്നിൽ വെച്ചോ കുട്ടികൾ വാശിപിടിക്കുമ്പോൾ മാതാപിതാക്കൾക്ക് അത് വലിയ നാണക്കേടായി തോന്നാറുണ്ട്. എന്നാൽ, ആറുവയസ്സു വരെയുള്ള കുട്ടികളിൽ കാണുന്ന ഇത്തരം വാശികൾ അവരുടെ വളർച്ചയുടെ ഭാഗമാണെന്ന് ആദ്യം തന്നെ നമ്മൾ മനസ്സിലാക്കണം. കുട്ടികളുടെ ഈ കടുംപിടുത്തങ്ങളെ സ്നേഹത്തോടെയും ബുദ്ധിപൂർവ്വവും എങ്ങനെയെല്ലാം മാറ്റിയെടുക്കാമെന്ന് നമുക്ക് നോക്കാം.
കുട്ടികൾ വാശിപിടിക്കുന്നത് എന്തുകൊണ്ട്?
രണ്ടു വയസ്സാകുന്നതോടെയാണ് സാധാരണയായി കുട്ടികൾ സ്വന്തം താല്പര്യങ്ങൾ പ്രകടിപ്പിച്ചു തുടങ്ങുന്നത്. അവർക്ക് ഇഷ്ടമുള്ള കളിപ്പാട്ടങ്ങൾ കിട്ടാതെ വരുമ്പോഴോ, തനിയെ നടക്കാൻ ശ്രമിക്കുമ്പോൾ നമ്മൾ കൈപിടിക്കുമ്പോഴോ ഒക്കെ അവർ കരഞ്ഞും ബഹളം വെച്ചും പ്രതിഷേധിക്കും. ഇത് കുട്ടികളുടെ മാനസികവും ശാരീരികവുമായ വളർച്ച ശരിയായ രീതിയിലാണ് നടക്കുന്നതെന്നതിന്റെ ലക്ഷണമാണ്. എന്നാൽ ഈ വാശി അതിരുകടന്ന്, അവർ സ്വയം വേദനിപ്പിക്കുകയോ മറ്റുള്ളവരെ ഉപദ്രവിക്കുകയോ ചെയ്യുന്ന അവസ്ഥയിലേക്ക് മാറിയാൽ കൃത്യമായ ശ്രദ്ധ നൽകേണ്ടതുണ്ട്.
വാശി കുറയ്ക്കാൻ അഞ്ച് ലളിതമായ വഴികൾ
1. അവഗണിക്കുക
കുട്ടികൾ ഒക്കത്തിരുന്ന് നമ്മളെ നുള്ളുകയോ അടിക്കുകയോ ചെയ്യുമ്പോൾ തിരിച്ച് അടിക്കുന്നതുകൊണ്ട് ഒരു പ്രയോജനവുമില്ല. അത്തരം സന്ദർഭങ്ങളിൽ കുട്ടിയെ അല്പനേരത്തേക്ക് തീരെ ശ്രദ്ധിക്കാതിരിക്കുകയാണ് നല്ലത്. നമ്മൾ മറ്റാരോടെങ്കിലും സംസാരിക്കുകയോ വേറെ ജോലിയിൽ മുഴുകുകയോ ചെയ്യുമ്പോൾ, തങ്ങളുടെ വാശി നടപ്പില്ലെന്ന് മനസ്സിലാക്കി അവർ തനിയെ ശാന്തരാകും.
2. സ്നേഹത്തോടെയുള്ള നിയന്ത്രണം
ശാരീരികമായി ഉപദ്രവിക്കാതെ തന്നെ കുട്ടികൾക്ക് കാര്യങ്ങൾ മനസ്സിലാക്കിക്കൊടുക്കാൻ സാധിക്കും. അവർ ചെയ്യുന്നത് തെറ്റാണെന്ന് ബോധ്യപ്പെടുത്താൻ മുഖം അല്പം ഗൗരവത്തിലാക്കുകയോ ശബ്ദത്തിൽ ചെറിയ വ്യത്യാസം വരുത്തുകയോ ചെയ്യാം. മാതാപിതാക്കളുടെ ഈ മാറ്റം കാണുമ്പോൾ തങ്ങൾ ചെയ്തത് ശരിയായില്ലെന്ന് അവർക്ക് മനസ്സിലാകും.
3. അപകടകരമായ സാഹചര്യങ്ങളിൽ ഇടപെടുക
വാശി പിടിച്ച് കുട്ടികൾ സ്വയം വേദനിപ്പിക്കാൻ നോക്കുമ്പോൾ പെട്ടെന്ന് കാര്യങ്ങൾ സാധിച്ചു കൊടുക്കരുത്. എന്നാൽ അവർക്ക് പരിക്കേൽക്കാൻ സാധ്യതയുള്ള സാഹചര്യമാണെങ്കിൽ ഉടൻ തന്നെ അവരെ അവിടെനിന്നും മാറ്റി സുരക്ഷിതമായ സ്ഥലത്തേക്ക് മാറ്റാൻ ശ്രദ്ധിക്കണം.
4. എല്ലാ ആവശ്യങ്ങളും അംഗീകരിക്കാതിരിക്കുക
കുട്ടികൾ വാശിപിടിക്കുമ്പോഴേക്കും ചോദിക്കുന്നതെല്ലാം വാങ്ങി നൽകുന്ന ശീലം ഒഴിവാക്കുക. കരഞ്ഞാൽ എന്തും സാധിച്ചു കിട്ടുമെന്ന് കുട്ടി ചിന്തിക്കാൻ ഇത് കാരണമാകും. അതിനാൽ ആവശ്യമില്ലാത്ത കാര്യങ്ങൾ സാധിച്ചു കൊടുക്കില്ലെന്ന് ഉറച്ച തീരുമാനമെടുക്കാൻ മാതാപിതാക്കൾക്ക് കഴിയണം.
5. സാഹചര്യങ്ങൾ മനസ്സിലാക്കുക
ചില പ്രത്യേക സാഹചര്യങ്ങളിൽ കുട്ടികൾ കാണിക്കുന്ന വാശിയെ നമ്മൾ അനുതാപത്തോടെ കാണണം. ഉദാഹരണത്തിന് പനിയോ മറ്റ് അസുഖങ്ങളോ ഉള്ളപ്പോഴോ, ഉറക്കം വരുമ്പോഴോ അവർ കൂടുതൽ കടുംപിടുത്തം കാണിക്കാറുണ്ട്. ഇത്തരം സമയങ്ങളിൽ അവരെ ചേർത്തുപിടിച്ച് സ്നേഹത്തോടെ പരിചരിക്കുകയാണ് വേണ്ടത്.
വിദഗ്ദ്ധ ചികിത്സ തേടേണ്ടത് എപ്പോൾ?
ചില കുട്ടികളിൽ കാണുന്ന അമിതമായ വാശി വെറുമൊരു സ്വഭാവപ്രശ്നം ആയിരിക്കില്ല. ഓട്ടിസം പോലുള്ള അവസ്ഥകളുള്ള കുട്ടികൾക്ക് മറ്റുള്ളവരുമായി ഇടപഴകാൻ ബുദ്ധിമുട്ടുള്ളതുകൊണ്ട് അവർ തങ്ങളുടെ മാനസിക ബുദ്ധിമുട്ടുകൾ വാശിയിലൂടെയാകാം പുറത്തുപറയുന്നത്. അതുപോലെ എല്ലാ കാര്യങ്ങളോടും കടുത്ത എതിർപ്പ് കാണിക്കുന്ന മാനസികാവസ്ഥയും കൃത്യമായ ചികിത്സയിലൂടെ മാറ്റിയെടുക്കാൻ സാധിക്കും. ആറുവയസ്സിനുള്ളിൽ തന്നെ ഇത്തരം സ്വഭാവവ്യത്യാസങ്ങൾ തിരിച്ചറിഞ്ഞ് ഡോക്ടർമാരുടെ സഹായത്തോടെ കൗൺസിലിംഗോ മറ്റ് തെറപ്പികളോ നൽകുന്നത് കുട്ടികളുടെ ഭാവിക്ക് നല്ലതാണ്.
മാതാപിതാക്കളുടെ നിയന്ത്രണം
കുട്ടികളുടെ വാശി കാണുമ്പോൾ ഓഫീസിലെയും വീട്ടിലെയും മാനസിക സമ്മർദ്ദം കാരണം മാതാപിതാക്കൾ പെട്ടെന്ന് ദേഷ്യപ്പെടാറുണ്ട്. എന്നാൽ കുട്ടികളുടെ മുന്നിൽ വച്ച് അച്ഛനമ്മമാർ പരസ്പരം കുറ്റപ്പെടുത്തുകയോ വഴക്കിടുകയോ ചെയ്യരുത്. കുട്ടികൾ തെറ്റ് ചെയ്യുമ്പോൾ ചെറിയ നീരസം കാണിക്കുകയും, അവർ നല്ല കാര്യങ്ങൾ ചെയ്യുമ്പോൾ കെട്ടിപ്പിടിച്ച് അഭിനന്ദിക്കുകയും ചെയ്യുക. ഈ രീതിയിലൂടെ മാത്രമേ നല്ലതും ചീത്തയും തമ്മിലുള്ള വ്യത്യാസം കുട്ടികൾക്ക് തിരിച്ചറിയാൻ സാധിക്കുകയുള്ളൂ.
കുട്ടികളുടെ വാശി എന്നത് മാതാപിതാക്കൾക്ക് മറ്റുള്ളവരുടെ മുന്നിൽ വച്ച് ഉണ്ടാകുന്ന ഒരു നാണക്കേടല്ല. അതിനെ ഒരു വളർത്തുദോഷമായി കണ്ട് വിഷമിക്കുന്നതിലും നല്ലത്, സ്നേഹത്തോടെയും ക്ഷമയോടെയും അതിനെ നേരിടുകയാണ്. ശാസനയും തല്ലും നൽകുന്നതിനേക്കാൾ മാതാപിതാക്കളുടെ സ്നേഹപൂർണ്ണമായ പെരുമാറ്റമാണ് കുട്ടികളെ നല്ല വ്യക്തിത്വമുള്ളവരായി വളർത്താൻ സഹായിക്കുന്നത്.
