ഐക്യരാഷ്ട്രസഭയുടെ അടുത്ത സെക്രട്ടറി ജനറൽ സ്ഥാനത്തേക്ക് ഉഗാണ്ടൻ നയതന്ത്രജ്ഞനായ ഒളാര ഒട്ടുനുവുകൂടി രംഗപ്രവേശനം ചെയ്തു. നിലവിലെ സെക്രട്ടറി ജനറൽ അന്റോണിയോ ഗുട്ടെറസിന്റെ കാലാവധി ഈ വർഷം അവസാനത്തോടെ അവസാനിക്കാനിരിക്കെ, ഈ പദവിയിലേക്ക് മത്സരിക്കുന്ന ഏഴാമത്തെ സ്ഥാനാർത്ഥിയാണ് 75 കാരനായ ഒളാര ഒട്ടുനു.
യു.എൻ പൊതുസഭയുടെയും സുരക്ഷാ കൗൺസിലിന്റെയും പ്രസിഡന്റുമാർക്ക് അയച്ച കത്തിലൂടെ ഉഗാണ്ടയാണ് ഒട്ടുനുവിന്റെ സ്ഥാനാർത്ഥിത്വം ഔദ്യോഗികമായി പ്രഖ്യാപിച്ചത്. നിലവിലെ സ്ഥാനാർത്ഥികളിൽ ഏറ്റവും പ്രായം കൂടിയ വ്യക്തിയാണ് അദ്ദേഹം. യു.എൻ അണ്ടർ സെക്രട്ടറി ജനറലായും, കുട്ടികളും സായുധ സംഘട്ടനങ്ങളും സംബന്ധിച്ച സവിശേഷ പ്രതിനിധിയായും അദ്ദേഹം സേവനം അനുഷ്ഠിച്ചിട്ടുണ്ട്. ഉഗാണ്ടയുടെ വിദേശകാര്യ മന്ത്രിയായും അദ്ദേഹം പ്രവർത്തിച്ചിട്ടുണ്ട്.
ഐക്യരാഷ്ട്രസഭയിൽ അടിയന്തരമായ ഭരണഘടനാ പരിഷ്കരണങ്ങൾ കൊണ്ടുവരിക, പ്രധാന അന്താരാഷ്ട്ര സംഘർഷങ്ങൾ അവസാനിപ്പിക്കാൻ മുൻകൈയെടുക്കുക, ആർട്ടിഫിഷ്യൽ ഇന്റലിജൻസ് നിരീക്ഷിക്കാൻ പ്രത്യേക സമിതി രൂപീകരിക്കുക, സാമ്പത്തിക വളർച്ചയെ ബാധിക്കാത്ത രീതിയിലുള്ള കാലാവസ്ഥാ വ്യതിയാന നടപടികൾ നടപ്പിലാക്കുക എന്നിവയാണ് തന്റെ കാഴ്ചപ്പാടുകളായി അദ്ദേഹം മുന്നോട്ടുവെക്കുന്നത്.
