ലോകകപ്പ് ഫുട്ബോളിന്റെ ക്വാർട്ടർ ഫൈനൽ മത്സരങ്ങൾക്ക് നാളെ തുടക്കം കുറിക്കുമ്പോൾ, ആദ്യ പോരാട്ടത്തിൽ മുൻ ചാമ്പ്യന്മാരായ ഫ്രാൻസ് കരുത്തരായ മൊറോക്കയെ നേരിടും. ജൂലൈ പത്തിന് പുലർച്ചെ 1.30-ന് നടക്കുന്ന മത്സരത്തിൽ വിജയിക്കുന്നവർക്ക് സെമി ഫൈനലിലേക്ക് മുന്നേറാം. നിലവിലെ സൂപ്പർ താരം കിലിയൻ എംബാപ്പെയുടെ മികവിൽ തുടർച്ചയായ വിജയങ്ങളുമായി കുതിക്കുന്ന ഫ്രാൻസിന്, ഏത് പ്രതിസന്ധിയെയും അതിജീവിക്കാൻ കെൽപ്പുള്ള മൊറോക്കൻ സംഘം കടുത്ത വെല്ലുവിളിയാകും.
ഏഴ് ഗോളുകളുമായി ഗോൾ വേട്ടയിൽ മുന്നിലുള്ള എംബാപ്പെയാണ് ഫ്രാൻസിന്റെ പ്രധാന കരുത്ത്. ഒപ്പം ഒസുമാനെ ഡെംബലെയും ബ്രാഡ്ലി ബാർകോളയും ചേർന്നുള്ള മുന്നേറ്റനിര ഏതു പ്രതിരോധത്തെയും തകർക്കാൻ ശേഷിയുള്ളവരാണ്. അതേസമയം, കഴിഞ്ഞ 35 മത്സരങ്ങളായി ഒരു തോൽവി പോലും അറിയാതെ കുതിപ്പ് നടത്തുന്ന മൊറോക്കോ, ക്യാപ്റ്റൻ അഷ്റഫ് ഹക്കീമിയുടെയും ബ്രാഹിം ഡയസിന്റെയും നേതൃത്വത്തിൽ അട്ടിമറി വിജയം ലക്ഷ്യമിട്ടാണ് കളത്തിലിറങ്ങുന്നത്.
ഈ മത്സരത്തോടെ ഫ്രഞ്ച് പരിശീലകൻ ദിദിയർ ദെഷോം ഒരു ചരിത്രനേട്ടത്തിനരികെയാണ്. 25-ാമത്തെ ലോകകപ്പ് മത്സരത്തിൽ ടീമിനെ പരിശീലിപ്പിക്കുന്നതോടെ, കൂടുതൽ മത്സരങ്ങളിൽ ടീമിനെ നയിച്ച പരിശീലകൻ എന്ന റെക്കോർഡിനൊപ്പം ദെഷോമെത്തും. 2012-ൽ ചുമതലയേറ്റതു മുതൽ ഫ്രാൻസിനായി ഒരു കിരീടം നേടിക്കൊടുത്ത ദെഷോമിന്റെ തന്ത്രങ്ങൾ ഈ പോരാട്ടത്തിലും നിർണ്ണായകമാകും.
