രാജ്യത്ത് തെക്കുപടിഞ്ഞാറൻ കാലവർഷം എത്തുന്നതിനുള്ള സാഹചര്യങ്ങൾ അനുകൂലമാണെന്നും ഇന്ന് കാലവർഷം കേരളത്തിൽ പ്രവേശിക്കാൻ സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് (IMD) അറിയിച്ചു. മൺസൂൺ കൂടുതൽ ഭാഗങ്ങളിലേക്ക് വ്യാപിക്കുന്ന പശ്ചാത്തലത്തിൽ അയൽസംസ്ഥാനമായ തമിഴ്നാടിന്റെ പടിഞ്ഞാറൻ, തെക്കൻ മേഖലകളിലെ 15-ലധികം ജില്ലകളിൽ കാലാവസ്ഥാ വകുപ്പ് ശക്തമായ മഴ മുന്നറിയിപ്പ് പുറപ്പെടുവിച്ചിട്ടുണ്ട്.
സാധാരണയായി എല്ലാ വർഷവും ജൂൺ ഒന്നോടെയാണ് കാലവർഷം കേരളത്തിൽ എത്താറുള്ളത്. ഇത്തവണ മെയ് 26-ഓടെ മൺസൂൺ കേരളത്തിലെത്തുമെന്നായിരുന്നു കാലാവസ്ഥാ വകുപ്പിന്റെ ആദ്യ പ്രവചനം. എന്നാൽ പിന്നീട് ഇത് വൈകുകയും, ജൂൺ ആദ്യവാരത്തോടെ മാത്രമേ കാലവർഷം എത്തുകയുള്ളൂ എന്ന് മെയ് 29-ന് ഐ. എം. ഡി വ്യക്തമാക്കുകയും ചെയ്യുകയായിരുന്നു.
