മിഡിൽ ഈസ്റ്റിൽ അമേരിക്കയും ഇറാനും തമ്മിലുള്ള സൈനിക ഏറ്റുമുട്ടൽ അഞ്ചാം മാസത്തിലേക്ക് കടക്കവെ, ഇറാന്റെ ഏറ്റവും സുരക്ഷിതമായ ഭൂഗർഭ ആണവനിലയത്തിന് നേരെ ഉടൻ ശക്തമായ ആക്രമണമുണ്ടാകുമെന്ന് യുഎസ് പ്രസിഡന്റ് ഡൊണാൾഡ് ട്രംപ്. മധ്യ ഇറാനിൽ സ്ഥിതി ചെയ്യുന്ന ‘കൊലാങ് ഗാസ്ല’ എന്ന മലനിരകൾക്കടിയിലുള്ള രഹസ്യ ഭൂഗർഭ കേന്ദ്രം ആക്രമിക്കുമെന്നാണ് ട്രംപിന്റെ താക്കീത്.
ലെബനൻ പ്രസിഡന്റ് ജോസഫ് ഔണുമായി ഓവൽ ഓഫീസിൽ നടത്തിയ കൂടിക്കാഴ്ചയിലാണ് ട്രംപ് ഈ മുന്നറിയിപ്പ് നൽകിയത്. ഇറാൻ ആണവായുധ നിർമ്മാണത്തിനാവശ്യമായ യന്ത്രങ്ങൾ ഈ കേന്ദ്രത്തിലേക്ക് മാറ്റിയിട്ടുണ്ടാകാമെന്നാണ് അമേരിക്ക സംശയിക്കുന്നത്.
മുൻപ് ആക്രമിക്കപ്പെട്ട ഫോർഡോ (Fordow), നതാൻസ് (Natanz) നിലയങ്ങളേക്കാൾ ആഴത്തിലും കട്ടിയുള്ള പാറക്കെട്ടുകൾക്കടിയിലുമാണ് ഇത് നിർമ്മിച്ചിരിക്കുന്നത്. അമേരിക്കയുടെ ശക്തമായ ബങ്കർ-ബസ്റ്റർ ബോംബുകൾക്ക് പോലും പെട്ടെന്ന് തകർക്കാൻ കഴിയാത്ത തരത്തിലാണ് ഇതിന്റെ തുരങ്ക കവാടങ്ങൾ രൂപകൽപ്പന ചെയ്തിരിക്കുന്നത്.
അതേസമയം, തങ്ങളുടെ ആണവനിലയങ്ങൾക്ക് നേരെ ആക്രമണമുണ്ടായാൽ അതിനെ പൂർണ്ണ യുദ്ധമായി കണക്കാക്കുമെന്നും മേഖലയിലെ അമേരിക്കൻ താവളങ്ങൾക്കും സഖ്യരാജ്യങ്ങൾക്കും നേരെ അതിശക്തമായ തിരിച്ചടിയുണ്ടാകുമെന്നും ഇറാന്റെ സൈനിക കേന്ദ്രങ്ങൾ മുന്നറിയിപ്പ് നൽകി.
