അഞ്ച് തവണ ലോക ചാമ്പ്യന്മാരായ ബ്രസീലിനെ ഒന്നിനെതിരെ രണ്ട് ഗോളുകൾക്ക് തകർത്ത് നോർവേ ചരിത്രത്തിലാദ്യമായി ലോകകപ്പ് ക്വാർട്ടർ ഫൈനലിൽ പ്രവേശിച്ചു. നോർവീജിയൻ സൂപ്പർ താരം എർലിങ് ഹാലൻഡ് അവസാന നിമിഷങ്ങളിൽ നേടിയ ഇരട്ട ഗോളുകളാണ് ബ്രസീലിന്റെ ലോകകപ്പ് മോഹങ്ങൾക്ക് അന്ത്യം കുറിച്ചത്. ഇതോടെ 36 വർഷത്തിനിടയിൽ ആദ്യമായി ബ്രസീൽ ക്വാർട്ടർ ഫൈനൽ കാണാതെ ലോക കപ്പിൽ നിന്ന് പുറത്തായി.
ന്യൂജേഴ്സിയിൽ നടന്ന ആവേശകരമായ മത്സരത്തിൽ ബ്രസീലിനായിരുന്നു തുടക്കത്തിൽ മേധാവിത്വം. കാർലോ ആൻസലോട്ടിയുടെ കീഴിലിറങ്ങിയ കാനറികൾക്കായി ഒന്നാം പകുതിയിൽ ബ്രൂണോ ഗിമാരസ് എടുത്ത പെനാൽറ്റി നോർവേ ഗോൾകീപ്പർ ഓറിയൻ നെയ്ലാൻഡ് തടുത്തിട്ടു. മത്സരത്തിലുടനീളം മികച്ച സേവുകളുമായി നെയ്ലാൻഡ് നോർവേയുടെ രക്ഷകനായി മാറി.
തുടർന്ന് 79-ാം മിനിറ്റിൽ തകർപ്പൻ ഹെഡ്ഡറിലൂടെ ഹാലൻഡ് നോർവേയെ മുന്നിലെത്തിച്ചു. പത്ത് മിനിറ്റുകൾക്കു ശേഷം (89-ാം മിനിറ്റ്) ശക്തമായ ഒരു ഷോട്ടിലൂടെ ഹാലൻഡ് നോർവേയുടെ ലീഡ് രണ്ടാക്കി ഉയർത്തി. ഇഞ്ചുറി ടൈമിന്റെ അവസാന നിമിഷങ്ങളിൽ സൂപ്പർ താരം നെയ്മർ ജൂനിയർ പെനാൽറ്റിയിലൂടെ ബ്രസീലിനായി ഒരു ഗോൾ മടക്കിയെങ്കിലും പരാജയം ഒഴിവാക്കാനായില്ല.
തങ്ങളുടെ ഫുട്ബോൾ ചരിത്രത്തിൽ ആദ്യമായാണ് നോർവേ ലോകകപ്പിന്റെ അവസാന എട്ടിൽ ഇടം നേടുന്നത്. ക്വാർട്ടറിൽ മെക്സിക്കോ – ഇംഗ്ലണ്ട് മത്സരത്തിലെ വിജയികളെയാകും നോർവേ നേരിടുക. മറുവശത്ത്, 1990 ന് ശേഷം ആദ്യമായാണ് ബ്രസീൽ ക്വാർട്ടർ ഫൈനലിനു മുൻപ് ലോകകപ്പിൽ നിന്ന് പുറത്താകുന്നത്.
