രാജ്യത്ത് പാസ്പോർട്ട് എടുക്കുന്നതിനും പുതുക്കുന്നതിനുമുള്ള ഫീസ് വർദ്ധിപ്പിച്ചുകൊണ്ട് കേന്ദ്ര വിദേശകാര്യ മന്ത്രാലയം പുതിയ ഉത്തരവ് പുറപ്പെടുവിച്ചു. വരാനിരിക്കുന്ന ജൂലൈ ഒന്ന് മുതൽ പ്രാബല്യത്തിൽ വരുന്ന ഈ മാറ്റം അനുസരിച്ച് മുതിർന്നവർക്കുള്ള സാധാരണ പാസ്പോർട്ട് ഫീസ് 2,500 രൂപയായും തത്കാൽ ഫീസ് 5,000 രൂപയായും ഉയർത്തിയിട്ടുണ്ട്.
പുതിയ പാസ്പോർട്ടുകൾക്ക് പുറമെ കേടുപാടുകൾ സംഭവിച്ചവ മാറ്റിയെടുക്കുന്നതിനും കുട്ടികളുടെ പാസ്പോർട്ട് നിരക്കുകളിലും ആനുപാതികമായ വർദ്ധനവ് വരുത്തിയിട്ടുണ്ട്. കൂടാതെ പോലീസ് ക്ലിയറൻസ് സർട്ടിഫിക്കറ്റ് (പി.സി.സി) പോലുള്ള മറ്റ് അനുബന്ധ സേവനങ്ങളുടെ ഫീസ് 750 രൂപയായി പുതുക്കി നിശ്ചയിച്ചതായും കേന്ദ്ര സർക്കാർ അറിയിച്ചു.
അതേസമയം, പാസ്പോർട്ട് എന്നത് കേവലം ഒരു യാത്രാ രേഖ മാത്രമാണെന്നും അത് ഇന്ത്യൻ പൗരത്വത്തിന്റെ അന്തിമ തെളിവല്ലെന്നും വിദേശകാര്യ മന്ത്രാലയം വ്യക്തമാക്കുകയുണ്ടായി. വോട്ടർപട്ടികയിൽ നിന്നുള്ള ഒഴിവാക്കലുകളുമായി ബന്ധപ്പെട്ട് ഉയർന്നുവന്ന സംശയങ്ങൾക്ക് മറുപടിയായാണ് മന്ത്രാലയം ഈ പഴയ നിയമം വീണ്ടും ഓർമ്മിപ്പിച്ചത്.
