ആഗോളതലത്തിലുണ്ടാകുന്ന കാലാവസ്ഥാ വ്യതിയാനം കാരണം ലോകത്തിലെ 26 ചെറിയ ദ്വീപ് രാജ്യങ്ങളിലെ 27 ലക്ഷത്തിലധികം മനുഷ്യർ ഭക്ഷ്യപ്രതിസന്ധി നേരിടുന്നതായി പ്രശസ്ത മെഡിക്കൽ മാസികയായ ലാൻസെറ്റിന്റെ പുതിയ പഠന റിപ്പോർട്ട് വ്യക്തമാക്കുന്നു. ഈ രാജ്യങ്ങളിൽ അടിക്കടിയുണ്ടാകുന്ന വരൾച്ചയും അമിതമായ ചൂടുമാണ് ജനങ്ങളുടെ ജീവിതം പ്രതിസന്ധിയിലാക്കാൻ പ്രധാന കാരണം. കഴിഞ്ഞ വർഷങ്ങളിൽ ഉണ്ടായ കടുത്ത ചൂട് കാരണം ഇവിടുത്തെ ജനങ്ങൾക്ക് വലിയ തോതിൽ ജോലിസമയം നഷ്ടമായതെന്നും റിപ്പോർട്ടിൽ പറയുന്നു.”
ആഗോളതലത്തിൽ അന്തരീക്ഷ മലിനീകരണത്തിന് ഏറ്റവും കുറവ് കാരണമാകുന്ന ഈ പാവപ്പെട്ട രാജ്യങ്ങളാണ് നിലവിൽ കാലാവസ്ഥാ വ്യതിയാനത്തിന്റെ ദുരിതങ്ങൾ ഏറ്റവും കൂടുതൽ അനുഭവിക്കുന്നത്. അമിതമായ ചൂട് മൂലം കൊച്ചുകുട്ടികളും പ്രായമായവരും വലിയ ആരോഗ്യപ്രശ്നങ്ങളാണ് നേരിട്ടുകൊണ്ടിരിക്കുന്നത്. ഇതിനുപുറമെ സമുദ്രത്തിലെ താപനില വർദ്ധിക്കുന്നത് ഇവിടുത്തെ പ്രധാന വരുമാനമാർഗ്ഗമായ മത്സ്യബന്ധന മേഖലയെയും ഭക്ഷ്യസുരക്ഷയെയും ദോഷകരമായി ബാധിക്കുന്നുണ്ട്.
പ്രതിസന്ധികൾ ഇത്രയും രൂക്ഷമാണെങ്കിലും ഇത്തരം വലിയ ദുരന്തങ്ങളെ പ്രതിരോധിക്കാനുള്ള വ്യക്തമായ പദ്ധതികളോ സാമ്പത്തിക സഹായങ്ങളോ പല ദ്വീപ് രാജ്യങ്ങൾക്കും ഇപ്പോഴും ലഭ്യമല്ല. എങ്കിലും മുൻകാലങ്ങളെ അപേക്ഷിച്ച് സൗരോർജ്ജത്തിന്റെ ഉപയോഗം വർദ്ധിപ്പിക്കാനും ദുരന്തങ്ങൾ നേരത്തെ തിരിച്ചറിയാനുള്ള സംവിധാനങ്ങൾ ഒരുക്കാനും ഈ രാജ്യങ്ങൾക്ക് സാധിച്ചിട്ടുണ്ട്. വരാനിരിക്കുന്ന രാജ്യാന്തര കാലാവസ്ഥാ സമ്മേളനങ്ങളിൽ ഇത്തരം രാജ്യങ്ങളുടെ ആരോഗ്യ സംരക്ഷണത്തിന് മുൻഗണന നൽകണമെന്ന് ഗവേഷകർ ഒരേസ്വരത്തിൽ ആവശ്യപ്പെടുന്നു.
