സൈപ്രസ് പ്രശ്നത്തിന് ശാശ്വത പരിഹാരം കാണുന്നതിനുള്ള യു.എൻ പ്രതിബദ്ധത ആവർത്തിക്കാനായി യു.എൻ സെക്രട്ടറി ജനറൽ അന്റോണിയോ ഗുട്ടെറസ് സൈപ്രസിൽ എത്തി. എക്സ് പ്ലാറ്റ്ഫോമിലൂടെയാണ് അദ്ദേഹം ഇക്കാര്യം അറിയിച്ചത്.
സൈപ്രസിലെ ജനങ്ങൾക്ക് സമഗ്രവും സുസ്ഥിരവുമായ സമാധാന ചർച്ചകളിൽ പിന്തുണയേകാനാണ് തന്റെ സന്ദർശനമെന്ന് ഗുട്ടെറസ് വ്യക്തമാക്കി. “യു.എൻ സമാധാനം അടിച്ചേൽപ്പിക്കില്ല, നേതാക്കൾ വഴി സൈപ്രസിലെ ജനങ്ങൾക്ക് മാത്രമേ അത് നിർമ്മിക്കാൻ സാധിക്കൂ” എന്നും അദ്ദേഹം കൂട്ടിച്ചേർത്തു. സന്ദർശന വേളയിൽ നോർത്ത് സൈപ്രസ് തുർക്കിഷ് റിപ്പബ്ലിക് (TRNC) പ്രസിഡന്റ് തുഫാൻ എർഹുർമാൻ, ഗ്രീക്ക് സൈപ്രസ് ഭരണകൂട നേതാവ് നിക്കോസ് ക്രിസ്റ്റോഡൗലിഡസ് എന്നിവരുമായി ഗുട്ടെറസ് കൂടിക്കാഴ്ച നടത്തും.
തുർക്കിഷ് സൈപ്രസുകാരും ഗ്രീക്ക് സൈപ്രസുകാരും തമ്മിൽ ദശാബ്ദങ്ങളായി നിലനിൽക്കുന്ന തർക്കങ്ങൾ പരിഹരിക്കാൻ യു.എൻ നിരന്തരമായി ശ്രമിച്ചു വരികയാണ്. സൈപ്രസിലെ സമാധാന സംരക്ഷണത്തിനായി 1964 മുതൽ യു.എൻ പീസ് കീപ്പിംഗ് ഫോഴ്സ് (UNFICYP) ഇവിടെ നിലയുറപ്പിച്ചിട്ടുണ്ട്.
