കനത്ത പ്രളയം ദുരന്തം വിതച്ച അഫ്ഗാനിസ്ഥാനിലെ ജനങ്ങൾക്ക് അടിയന്തര ദുരിതാശ്വാസ സഹായങ്ങളയച്ച് ഇന്ത്യ. പ്രളയക്കെടുതി അനുഭവിക്കുന്ന ജനങ്ങളെ സഹായിക്കുന്നതിനായി ഭക്ഷണ സാധനങ്ങളും താൽക്കാലിക താമസത്തിനുള്ള തമ്പുകളും ഇന്ത്യ അഫ്ഗാനിസ്ഥാന് കൈമാറി. അഫ്ഗാനിസ്ഥാനിലെ ദുരന്തനിവാരണ സേനയ്ക്കാണ് ഈ സഹായ സാമഗ്രികൾ കൈമാറിയത്.
അഫ്ഗാനിലെ നൂറിസ്ഥാൻ പ്രവിശ്യയിലുണ്ടായ വലിയ പ്രളയത്തിൽപ്പെട്ട് നിരവധി ജനങ്ങളുടെ ജീവിതം കടുത്ത പ്രതിസന്ധിയിലാണ്. വീടുകളും ഭക്ഷണവും നഷ്ടപ്പെട്ട ആളുകൾക്ക് വലിയൊരാശ്വാസമാണ് ഇന്ത്യയുടെ ഈ അടിയന്തര ഇടപെടൽ. പ്രളയബാധിതർക്ക് ആവശ്യമായ പ്രാഥമിക സൗകര്യങ്ങൾ ഉറപ്പാക്കാൻ ഈ സാമഗ്രികൾ സഹായിക്കും.
ഈ പ്രയാസകരമായ ഘട്ടത്തിൽ അഫ്ഗാൻ ജനതയ്ക്കൊപ്പം ഇന്ത്യ ഉറച്ചുനിൽക്കുമെന്ന് വിദേശകാര്യ മന്ത്രാലയം ഔദ്യോഗികമായി അറിയിച്ചു. സോഷ്യൽ മീഡിയയിലൂടെയാണ് ഇന്ത്യ പിന്തുണ വ്യക്തമാക്കി പങ്കുവെച്ച സന്ദേശം പുറത്തുവിട്ടത്. അയൽരാജ്യങ്ങളുടെയും സൗഹൃദ രാജ്യങ്ങളുടെയും പ്രതിസന്ധികളിൽ എന്നും കൂടെനിൽക്കുന്ന നയമാണ് ഇന്ത്യ കൈക്കൊള്ളുന്നത്.
